TELP tailerren antolatzeko xedea dugu euskara ardatz duten hainbat elkarteen artean Baxenabarren. Huna tailer horien aurkezpen labur bat, euskararen aldeko kontzientzia duteneri gomita luzatzeko.

Zer da TELP?
Herrialde Katalanetan sortu tailer bat (Taller per la llengua), katalanaren erabilpen soziala bultzatzeko xedez. Euskal Herrian praktikatzeko egokiturik heldu zaigu, ikas dezagun eta ausart gaitezen euskara erabiltzen egun guziz, goxoki eta normal, ezagunekin ala ez, gure ingurumenean.

Zer ikasten da?
Tresna praktikoak ematen dira, euskaldunok euskaraz mintzatzeko ditugun aurreiritziak eta konplexuak gainditzeko gisan. Adibidez, saltoki batean lehen hitza euskaraz egitean ez zaigula deus larririk gertatuko ikasten da: horrela jokatuz, ateak zabaltzen ditugu, eta euskararen beharra baikorki sortzen.

Zergatik Baxe Nafarroan?
Guhaur ohar gaitezen toki pribilegiatuan bizi girela: gure xoko gehienetan, ez da zaila euskaraz dakien, edo bederen konprenitzen duen jendea topatzea. Aberastasun horretaz ohartzeko, tresna eraginkorra bezain sinplea da guk euskaraz luza dezagun lehen hitza, jendea berriz usa dadin euskaraz harremantzen.

Eta erdaldunak, zer?
Erdaldunak ere kontuan hartuak dira: horien enpatia lortzeko tresnak ikasten dira tailerrean, estres linguistikoa gaindituz, eta euskaraz aberastera gomitatuz.

Tailerrak nola iragaiten dira?
Psikologia sozialeko aditu batek mekanismo batzuk esplikatzen ditu, sinpleki, praktikoki eta ludikoki: hainbat ariketa konkretu eta jostagarrien bidez ikasten da. Tailerra bi saiotan banatua da (2 aldiz 5 oren), batetik bertzera entseguak egin ditzagun gure egunerokotasunean.

Nori zabalduak dira?
Eguneroko bere harremanetan euskararen eremua hedatu nahi duen nornahiri, euskaldun zahar eta berriari. Mintzapraktikak egun guziz egin nahi dituenari. Euskaraz bizitzeko nahia eta beharra sendi duen jaun, andere eta zirtzilari.

Noiz?
Izen-biltzeak abendu honetan egin nahi genituzke. Tailerrak printzipioz otsaila eta apirila artean burutu daitezke, izena emanen dutenen artean finkatuz egunik egokienak. Interesatua bazira, edo xehetasun gehiago nahi bazenu, idatzezazu hemen berean. (edo deitu : 07.88.18.88.96).

Gehiago xehetasun nahi badituzu, zoaz hemen, tailer hauek antolatzen dituen EMUN taldearen gunerat.