DANTZA filma Donapaleuko zineman

Nundik jiten da dantza ? Zertako dantzatzen dugu ? Zertarako balio digu ? Telmo ESNALek bilaketa horretan murgilarazten gaituela dirudi. Eta irudiak ederrak dira ! Donapaleuko zineman hiru aldiz agertuko da egun hauetan : 09/20an ostiralez 20:30tan, 09/22an, igandez 18:00tan eta 09/23an, astelehenez 21:00tan. Hona filmaren egileek nola presentatzen duten afera :

Ekaitza lehertu da landako lan egun gogor baten ondoren. Atertu duenean, bizitza sortu da lehen agor zen lurretik. Fruitu bat hazi eta heldu da, bizirik eutsi die izurrien erasoei, eta sagardoaren bizigai izango den sagar bihurtu da. Orduan, uzta ospatzeko tenorea da, topa egitekoa eta maitasunaren festan murgiltzekoa. Bizitzaren zikloari buruzko istorio bat, bizirik irauteko borrokarena. Horretan, denboraren iragatea naturaren ibilbideak markatuko du. Eta dantza da hori kontatzeko hautatu hizkuntza. Musikak eguneroko zereginei lagunduko die. Bizitza erritmoa da!

Gai unibertsalak, hemen sinbologia berezi batez jantziak. Dantza tradizionalen unibertso hipnotikoari dagokiona. Tradizioari, lurrari, haren jendeari, mitoei eta ohiturei egindako kantu poetiko bat. Izatearen mirariari buruzko kontaketa bat.

TELMO ESNALen filma, Juan Antonio URBELTZ delarik koreografia lanetan.