« 5 in’ahalak » talde gazteak, Amaiur Eppherren antzerki berria eskainiko dauku ostirale arratseko 9etan, Gabadin, buruilaren 11an. Joan den urtean, oroit gira, idazle gaztearen « Sapere aude » obra eskaini zuten Izpuran. Amikuzerat ezin izan zuten jin orduan, baina hitzartuak ginen, beste bat prestatuz geroz, ez zutela bakerik izanen hemen gaindi agertu aitzin. Alabaina bekan dira horrelako paradak, gazte batzuk, euskaratik eta euskaraz pentsatu, muntatu eta eskaini obra baten ikusteko paradak. Antzerkia edo bertsoa izan behar, jadanik kantua, dantza, pastorala ala ikusgarrigintzako triunfo edo bof! gehienak frantsesetik eta frantsesez pentsatuak baitira, euskaraz agertuta ere… « Qui trop embrasse, mal étreint ! » Alta badakigu : erabili, erabili, erabili, … muskuluak ere, baliatzearen bortxaz direla indartzen!

Huna « 5 in’ahalak » taldeak « Koñots ulia » antzerkiaz egiten daukun aurkezpena :

Iragan urtean, Sapere aude eman genuen, Kubako ugarteak inspiratu mundu urruti edo kasik onirikoan murgilduz. Bigarren lan honek berriz, Euskal Herriko baserri batera eramaten
gaitu, Uxue Alberdiren Euli giro (Susa, 2013) liburuaren “Dena ez dago gure esku” ipuina du oinarri.
Miren eta Koxe baserrira doaz, zendu berria den Amatxiren etxean instalatzera. Mirenek oportunitate profesionalei uko egin die, Koxeren haurtzaroko mundura itzultzeko.
Poliki poliki, etxe zaharrean markak hartzen ditu bikoteak, baina uliak fite agertzen zaizkio. Ulien presentzia gero eta trabagarriago, pizuago eta gaixtoago bilakatzen da…
Lau jokolari agertzen dira taula gainean, Antton Lukuren Garaziko lizeoko antzerki tailerretik pasatuak edo Sapere aude-n arituak. Testua apirilean eskuratu eta uztailean hasi dira antzerki berriaren muntaketan. Talde gazteak antzerkia Euskal Herrian zehar aurkeztea du helburu. Lehen emanaldia buruilaren 4 huntan dute Izpuran.
Gehiago jaki/ikus/teko :

http://www.kanaldude.tv/KonotsUliaantzerkiaprestatzen_v3952.html

http://www.kanaldude.tv/Sapereaudeantzerkiaprestatzen_v3130.html

http://begikliska.piwigo.com/index?/category/129sapere_aude

http://www.euskarakultur.org/eus/noticias/Gizarte/36923

Kontaktua :
amaiur3fcg@hotmail.fr / 06.36.66.51.12

https://www.facebook.com/5inahalak