Atharratzen abiatu eta 2026/03/29an Bilbora heldu zen 11.eguneko ibilbidearen ondotik Korrika. Aurten mezua zazpi probintzietako zazpi gaztek ondu dute, aniztasuna, gaztetasuna eta engaiamenduaren adibide argia zekartela.

Hauek izan dira mezua idatzi duten zazpi gazteak: Oier Iñurrieta Garmendia, Oihana Arana Cardenal, Elene Mengyu Larrinaga Bilbao, Beñat Jusue Rosano, Aitzol Gil de San Vicente Pla, Xalbat Alzugarai Etxeberri eta Leire Casamajou Elkegarai.

Bilboko udaletxearen aurrean, milaka euskaltzale parean zituztela, txandaka irakurri dute mezua:

«Euskara gara eta hemen gaude. Eskutik eskura trazatu dugu gure herriaren gorpuzkera. Hatsanturik, baina aitzina eraman gaitu gorputzak. Urrats bat eta bestea, lurrean errotuz.

Korrika dabilenean izerdiz betetzen den gorputza da gurea. Borrokaren eta desiraren aztarnak harro daramatzana. Korrika dabilenean taupadak azkartzen zaizkion gorputza da gurea. Asaldatu egiten dena. Nekatu egiten dena. Hunkitu egiten dena. Korrika dabilenean indarberritzen den gorputza da gurea. Etengabeko eraldaketak aberasten duena. Beti aurrerantz doana.

Gure gorputzak esan nahi duen dena euskaraz da, baina ez du esan nahi bakarrik euskara. Egin nahi du berba nekeaz, pozaz; botereaz, minaz. Egin nahi die orro batzuei eta irri besteei.

Zenbat gara? galdetzen genuenok nortzuk garen ere jakin nahi dugu orain. Nondik garen, zergatik egiten dugun hau guztia, zerk sortzen duen gutasuna. Euskara gara diogu, ez euskara naiz. Komunitateaz ari gara. Beso zabalik dagoen gorputzaz, zeinak leihoak dituen begietan. 

Urrats bat eta bestea, gorputz bat egin dugu denona. Ez dezagula ahaztu hori bihar, bakoitza berera itzultzen garenean. Euskarak egin du gorputza. Hizkuntzak eraldaketarako tresnak dira, leku bat ematen digute bizi gaitezen. Euskarak herri hau eman digu. Horregatik mintzo gara izateaz, egiteaz. Euskaraz egin egiten da, baina izatea ez da edozein gauza. Izatea egotea ere bada, nonbait mugimenduan, borrokan.

Urrats bat eta bestea, aurrekoei jasoa dakargu ahots berrietan. Honaino heldu gara, bai, baina ez gara iritsi. Oraina berehala amaitzen da. Azalberrituta datoz munstro zaharrak, baina gorputz bat sortu dugu. Askotarikoa, konprometitua, indartsua. Eta gaur hemen badago, egongo da bihar ere.

Euskara gara eta hemen gaude. Hemen gara eta euskaraz gaude.

Aurrera goaz. Bazatoz?»

Mezuaren idazleak

Mezuaren idazleek egin duten bidearen berri eman du AEK-k. Iñurrietak 25 urte ditu, irakaslea da, eta euskaraz bizi da Gasteizen. «Gero eta espazio eta eskaintza euskaldun gehiago ditugu gurean; horietako bat da Korrika baten harira sortu zen Zunba Herrikoia, zeinetan 2018tik hartzen dudan parte», kontatu du. Korrika beti izan du oso kuttun, gurasoei eta AEK-ko kide den izebari esker. Hamaika oroitzapen eder ditu; 23. Korrikan Gasteiz osoa egin zuen «furgoneta magiko horren barruan» esatari, eta orain bete du lekukoa eramateko ametsa: «Non eta Bilbon; noiz eta 24. Korrikan; zein eta azken kilometroa; nola eta mezulari gisa; norekin eta beste sei lagunekin».

Aranak ere 25 ditu, eta Eskoriatzakoa (Gipuzkoa) da; Korrikak txoko berezi bat dauka haren memorian: «Haurtzarora narama, jaioterrira, amaren eskura». Aranaren etxea beti izan da euskalduna eta euskaltzalea, baina argi du bederatzi urterekin bertso eskolan hasi izanak oso eragin sakona sortu ziola nerabezaroan, «neure burua euskaraz dela ondoriozta nezan». Donostiara joan zen Gizarte Antropologiako ikasketak egitera, «eta bertan topatu nituen transfeminismoa eta ikuspegi horretatik euskaraz bizitzeko aukera». Umetatik izan da berbazalea, eta zaletasuna ogibide bilakatu du: «Berbak oinarri dituzten hainbat arte adierazpide lantzen ditut orain nire egunerokotasunean: literatura eta bertsolaritza, batez ere».

Larrinagak 23 ditu, eta Barakaldokoa (Bizkaia) da; Txinan jaio zen, 2003an, eta 11 hilabeterekin heldu zen Euskal Herrira, gurasoek adoptatuta. Euskara txikitatik izan du presente: «Amak Pirritx eta Porrotxen kantak jartzen zituen, eta ETB3 pizten zuen, bi alabok Doraemon ikusteko». Amarekin joan zen lehendabizikoz Korrikara, 7 urterekin: 17. Korrika zen, eta buruz ikasi zuen Euskalakari kantaren letra. Nerabezaroan, D ereduan ikasi arren, «institutuko irakasleekin hitz egiteko bakarrik» erabiltzen zuen euskara, eta gainditu beharreko irakasgaia besterik ez zen harentzat. Amak AEK-n izena ematera animatu zuen, eta, unibertsitatera sartzean, ikasketak euskaraz egitea aukeratu zuen: «Lehen aldia izan zen hainbeste euskalki entzun nituena, eta ama izugarri poztu zen lagun berriekin euskaraz hitz egiten hasi nintzenean». Gaur egun, ahizpa eta biak euskaraz dakien lehen belaunaldia dira familian: «Ama hizkuntza gaztelera izan arren, ni euskalduna naiz amari esker».

Jusuek 28 ditu, eta Tuterakoa (Nafarroa) da. Argia ikastolan euskaldundu zen: «Hamasei urterekin konturatu nintzen zein txikia den Tutera». Orduan hasi zen, auzoko beste gazte batzuekin batera, Euskararen Eguna, gazte egunak eta bestelakoak antolatzen: «Pixkanaka, belaunaldi berriak gerturatzen hasi ziren, eta, Tuterako jaietan gazteontzako espazio propiorik ez zegoela konturatuta, txosnak jarri genituen». Batxilergoa gaztelaniaz egin ostean, unibertsitate garaiko urteetan militantziak ardaztu zuen haren bizitza; hala, 22 urterekin, Union Tutera taldearen sorreran parte hartu zuen, euskara, parekidetasuna eta kultur integrazioa sustatzeko. 28 urterekin, Tuterara itzuli da bizitzera: «Oraindik gauza asko ditugu egiteko, baina sinisten dut egunen batean euskaldunok Tudelako auzo periferikoa izateari utziko diogula; badakit ia 40.000 biztanleko hiria bihurtuko garela».

Gil de San Vicentek 23 urte ditu, eta Hendaiakoa (Lapurdi) da. Donostian jaioa da, bertan bizi izan zen zazpi urtera arte. Gatazka politikoaren ondorioz iritsi zen Ipar Euskal Herrira, eta haur motxiladuna izan zen. Euskara du ama hizkuntza, baina euskararekiko lotura Bernat Etxepare lizeoan sendotu zuen, «euskaraz ikasteko eskubidearen aldeko borrokan. Ipar eta Hego Euskal Herria lotu gintuzten ikastolek, ikasle mugimenduak eta euskarak». Garai hartan hasi zen militatzen, «eta orduan egin nintzen abertzale». Medikuntza ikasten ari da EHU Euskal Herriko Unibertsitatean: «Muga administratiboak oztopoak dakartzan arren, hori zen euskaraz ikasten jarraitzeko aukera bakarra».

Alzugaraik 24 ditu, Urepelekoa (Nafarroa Beherea) da, eta BERRIA egunkariko kazetaria da Baionako ordezkaritzan. Euskara etxean ukan zuen. Hezkuntza sistema elebidunean ibili zen hemezortzi urte izan arte. Besteak beste horren eraginez, zera gertatu zitzaiola esan du: «Nerabezaroan frantsesak gaina hartu zidan, etxetzat nuen hizkuntza kasik suntsitzeraino». Hamalau urte zituela, Korrika Urepeletik abiatu zen, eta horrek lagundu zion nolazpait etxeko zimenduak berriz eraikitzen. Ondotik izan ziren kolegiotik lizeorako saltoa eta euskarari buruzko kontzientziazio prozesuaren hastapena: «Hango irakasle batzuei eta, batez ere, bertan ezagutu lagunei zor diet berreraikitzen hasi zen etxearen zimenduak segurtatzea». Zimenduetatik paretak eraikitzerainoko bidean, Gasteizera joan zen. «Etxearen teilatua, berriz, Basaizea elkarteko lagunei zor diet, fakultate denboran hasi bainintzen hantxe engaiatzen». Geroztik gurutzatu dituen lekuek eta jendeek etxea bukatu eta fin apaindu diote, «ene etxea berriz ere euskara(z) izan dadin».

Azkenik, Casamajouk 23 ditu, eta Sohütakoa (Zuberoa) da. Alzugarai bezala, BERRIA egunkariko Baionako erredakzioan dabil lanean. Alta, frantsesa du ama hizkuntza, «ez amak ezta aitak ere ez baitzekiten euskaraz, ni eta ene ahizpa-anaiak sortu ginelarik». Haatik, euskaraz izan ez bada ere, «euskaratik hazi gaituzte hatsarretik, eta bide horretan jarraikitzen dute oraino ere. Hola egin gaituzte euskaltzale, abertzale; gure hizkuntzaren eta herriaren aldeko militante». Haiei zor die, hortaz, euskara izateko hautua ukan izana. Hautu horren egiteko adinera heldu zirelarik, hain zuzen, «gurasoen ildo beretik aritzea» deliberatu zuten ahizpa anaiek: «Hizkuntza ohiturak aldatu, eta euskaran murgildu ginen osorik, eskain ziezazkigukeen alde guziei beso zabalik. Orain arteko bidean, beste batzuek ere euskara egin gaituzte are gehiago: pertsonak eta lekuak, gaiak eta arloak; dudarik gabe, horietarik bat da Korrika».

Atharratzetik abiatzea sekulakoa izan da, eta Donapaleun ere animaleko jendetza bildu zen. Lasterka ari zirenak batetik, baina agian berritasuna zen, karrika bazterretan txaloka anitz-anitz jende bazegoela. Orduak ere lagundu zuen (7ak30).

Ondoko Korrika igurikatzen dugu bi urteren buruan, eta anartean gogotik erraiten ahalko dugu: Amikuzen ere… euskaraz !

Agian ikusi duzue, beste alditan egin den bezala, Korrikaren mapa argiztatua ezarri dela Herriko etxeko mitraren gibelean, Kenedi ostatuaren saihetsean. Sobera ederra egin daukute aurten ere :

Hona egunean berean hartu argazki zenbait hementxe. Aise gehiago atzemanen dituzue KORRIKAren webgune ofizialean.

Ttipi ttapa ttipi ttapa

24. KORRIKA heldu da Amikuzera…

Poteo-bazkari kantatua : Martxoaren 7an, ibiakoitz goizeko 10:30etan hitzordua Donapaleuko gau eskolan.

- eguerdiak arte, irekiak diren 3 ostatuetan kantu eta pintxo, kantuz eta dantzan, triki musiken xoramenean…

- oren batetan, Kantu bazkaria Gabadiko gelan, Gozo goseren eskutik. 20€ helduentzat eta 8€ haurrendako.

 - izen emaiteak mezuz otoi : 07 71 25 24 96

Korrika ttipi Donapaleun: Martxoaren 13an, ostirale arratsaldez.

Eskola guzien parte hartzearekin… Zoazte haien txalotzera !

Errigora aperitifa marrazkitua : Martxoaren 16an, astelehen arratseko 7etan, Touzaa etxean. Errigorako produktuen pintxo dastaketa Asisko Urmenetak diskurtsoz marrazkiturik…

Korrika gaualdia : Martxoaren 19an, ostegun astiri eta gauez

 Korrika Atharratzetik abiaturik, Arüen sartzen da 18.27tan eta Mehainetik jalitzen 21:20ak inguru. Donapaleun dukegu 19:25etan.

Lekuko eramaileen zerrenda kilometroz-kilometro atzemanen duzue ondotik den taulan.

Korrika pasatu ondotik pesta egiten ahalko dugu Airetik gelan. Jateko, edateko, dantzatzeko eta kantatzeko manera izanen da.

Gurekin izanen ditugu Andoni OLLOKIEGI eta GAITAMIK txaranga.

Ongi pasatzeko doia!

 Anartean gau eskolan lanean ari dira eta hainbat ekimen prestatu dituzte :

- Abenduaren 11an, gau eskolaren ateraldia : Kalostrapen untsa jan ondotik, Baionako Euskal museoan den Bernat Etxepareren liburuaren bisita eginen dugu. Momentuko 27 parte hartzaile ditugu.

- Abenduaren 13an, animazio batzordeak ateraldi bat antolatuko du : goizean Mauleko euskal gaztain etxearen bisita gidatua, bazkaria Europe jatetxean, eta arratsaldean Mauleko bisita gidatua.

- Abenduaren 18an Gau eskolaren biltzar nagusia + pintxo gaualdia Espeletenea ostatuan. 

Amikuzeko eta Oztibarreko gau eskolak bere urteko biltzar nagusia abenduaren 18an egin du Larzabalen, Espeletenia jatetxean. 30 kide elkartu dira 2024/2025 urteko aktibitateak eta konduak aztertzeko. Gau eskolak 102 ikasle errezibitu ditu urtean zehar eta kurtsoak, 10 irakasleek segurtatu dituzte, 12 taldeetan.

Kurtsoez gain, animazio taldeak aktibitate bereziak antolatu ditu ikasleek, bisita batzuen bidez, euskara erabiltzeko aukera ukan dezaten hala nola Pasaiako Albaola, Ibarlako Harispuru makila egileak eta Larzabaleko « Harriak Iguzkitan » Euskal Herriko hilarrien interpretazio gunea.

Aktibiateen eta konduen aurkezpena egin ondoan, txosten morala eta kontuak aho batez baieztatuak izan dira. Bulegoa ere arraberritua izan da.

Ondotik, bi urtetarik ezagutzen dugun Korrika famatua aipatua izan da. Helduden martxoaren 19an, 24. Korrika Atharratzetik abiatuko da eta Amikuzetik pasatuko. Xehetasunak ondoko egunetan ezagutaraziak izanen dira. Amikuzeko Gau eskola mobilizatua izanen da ekitaldia baldintza onetan antolatzeko eta horren inguruan antolatuak izanen diren ekintzetan parte hartzeko (korrika ttipi…).

Biltzar nagusiaren ondotik, gaualdiak segitu du baso baten inguruan Espelleteniak preparatu pintxoak gozatuz.

2026ko KORRIKA Atharratzetik abiatuko da, jakin dugunez. Laster jakinen dugu Amikuzen ze egun eta tenoretan iganen den. 

KORRIKAren gure herrietarik pasatzea prestako bilkura ideki bat eginen da urtarrilaren 22an, astiriko 6ak30etan, Iturzainenian.

Gauez-gaueko freskuran lasterka ibili ondoan, salda bero bat eskainia izan da deneri Donapaleuko merkatu estalian.

Bestalde, hainbat animazio burutu dira aurtengo Korrika kari.

KANTU BAZKARIA

Hasteko Kantu bazkaria martxoaren 2an, Gabadiko gelan Zabalikek antolaturik. 70 bat lagun bildu ginen eta arratsalde apala arte kantuz erauntsi. Aurtengo edizioan 54 kantu eman ziren. Aitzineko errekorra 71 kantutan zen, baina aurtengoan jendeak elaka artzeko beharra bazuen eta aperitifa denbora hortako hartu zen. Aldiz, jarri orduko, kantua kantuaren ondotik. Ez beti halere, ezen, Zabalik koziner team inprobisatuak ahotik ezin utzizko bazkaria prestatua baitzuen : barazki salda hautua, lukinka eta xingarra dilistekin, gasna Xibraltarreko Kattinena eta bixkotxa Donapaleu Mendivetik. Apairu ezinago xinplea, baina zein ona. Biba sukaldariak !

Belaunaldi guzietarik baginen, eta zinez kantuz artzea maite duenak, zorionaren gailurrera heltzeko ekai guziak hor atzeman zituen !

KORRIKA TTIPI

JOKO ATSASKARI ARRATSALDEA

DANTZA IKUSGARRIA

Martxoaren 23an, ibiakoitz arratsaldeko 5etan, Aiziritzeko gelan, Amikuzeko ikastolak antolaturik.

* Arratsaldeko 5etan, Burgaintziren ikusgarria : OREKAN (45 urteenkari sortua)

* 6etan, Elgar Oinkaren ikusgarria : EO! (Hazparneko taldearen 50 urteen kari sortua Lagunarte konpainiarekin)

* Ondotik, mutxikoak, jateko eta edateko!

Zatozte momentu goxo baten pasatzera Korrika eta udaberriaren heltzea ospatzeko!

Amikuzeko Ikastolaren alde – Sartzea 12 €/eusko

Jin gustian!

MAPA ARGIZTATUA

Nun dabil Korrika egunez-egun ? Horra denek egiten zuten galdera sukartsua Korrika dabilen 11 egunetan!

Donapaleuko Kenedi ostatu saihetseko herriko etxeko bitrinan ikusi ahal izan zen mapa argiztatu bat, zeintan eguerdi guziz Korrika noraino heldua den markatua zen.

Ikus eta sinets !

- 2023/11-28 : Joko gaualdia + jantzi salmenta egin zen Aiziritzeko gelan, 40 bat pertsona hurbildu zirelarik.

- 2024/02/16 : Korrika gaualdia eginen da Ezpeletenia ostatuan. Aurten Korrikak « Azterketak euskaraz » ekimena ohoratzen du eta gau hirtan horri buruzko dokumentala eskainiko da, apeitifa eta pintxoak gozatu aitzin. Ondotik kontzertuak Pisoo eta OPH / Txomin Kataloñekin.

- 2024/03/02 : Kantu bazkaria Zabalik-ekoek antolaturik.

Nafarroa Bizirik ekitaldian parte hartu duten guziak gomit dira pesta egun goxo baten partekatzerat.

- 2024/03/10 : Joko eta askari arratsaldea Gaztetxekoek antolaturik adin guzientdako.

- Aurten Korrika Amikuzen pasatzen da gauez gau 2024/03/15ko ostirale goiz partean. Donapaleun iganen da 4ak inguru, Mehainen sarturik 2ak t’erdi inguru eta Arüetik jaliz 5ak t’erdi inguru. Goiz jeikitzale guziak gomit izanen dira prestatuko den askarira : baratxuri salda, arrultze ta xingar, kafe edo xokolet bero, … Nork daki zer atzemanen duen aterbe bero baten pean.

- 2024/03/23 : Elgar-oinak Hazparneko dantza taldearen ikusgarria Ikastolak antolaturik

- Mapa argiztatua : azken urteetan bezala, Kennedy ondoko berinan Korrika nundik dabilen eta nola aitzinatzen den ikusteko parada ukanen dugu.

Eta 2024/03/24an, BAIONAn Korrikaren arribantxa, gaitzeko euforia eta pesta artean.

Orduan, zu ere tenizak jantzi, eta prest izan laster egiteko, pesta eta lillura artean…

Aurtengo KORRIKA errezebitzeko, prestaketa lanak egiten ari dira Amikuzen :

- kantu poteoa martxoaren 18an .

- kantu bazkaria Apirilaren 2an, eguerditan, Donapaleu Pinkenian. ZABALIK elkartekoek basurde saltsa prestatuko dute. Bazkaria eta edariak : 15€. Izenak eman behar dira edo imeilez Zabalik-i edo sms-ez 06.08.28.26.57

Azken Korriketako formula airosa errepikatzera hurbildu !

- Apirilaren 4an igaiten da Korrika Amikuzetik, Aruen sartu eta Bithiñatik jali. Huna ondoko taulan, ze tenoretan nun izanen den, eta noren kilometroa den.

Denbora berean, pasaiaren zain egoiteko, 7etarik aitzina merkatu estalian talo, edari eta musika izanen da Donapaleuko merkatu estalian. Gaitamik eta Burgaintziko txarangek alaiturik.

- Korrika denbora guzian, Donapaleu zentroan, herriko etxearen aldean, Euskal Herriko mapa argiztatu bat ikusiko duzue, egunez-egun Korrikaren aitzinamendua irudikatuko duena. Argazkian ikusten duzue Céline Mirailh-ek egin marrazki koloretsua Donapaleu erditan.

1127.kilometroa: Zubia hasten denean, itzuli normala, autoak bezala, kasino arte

1128. kilometroa: Kasino, thiers karrika, merkatu estaliaren itzulia, thiers karrika, foirail plaza, thiers karrika, fleur piment

1129. kilometroa : Fleurs piment, eliza, gau eskolaren aitzinean, Oxidoy karrika

Korrika lantaldeak animazio zonbait prestatu ditu martxo huntako.

YEZHOU bretaindar filma, martxoaren 12an

Helduden asteartean, martxoaren 12an, arratseko 8ak30etan, YEZHOU dokumentala proiektatuko da DONAPALEUko zineman.

Morgane Lincy, filmaren egilea, mundu zabalean gaindi ibili da hizkuntz gutiagotuetako lekukotasun bila : han eta hor.

Bera hor izanen dugu filmaren ondotik zuen galdereri ihardesteko.

Filma bretoindarrez izanik, zuzenezko itzulpen bat segurtatuko da mikrotik euskaraz. Frantsesezkoa ere segurtatuko da beharriko xuxurlaz.

KANTU BAZKARIA 03/24an

Duela 2 urte bezala, DONAPALEU Pinkenia (edo Bakearen) ostatuan, kantu bazkari bat antolatua da. Han zirenak oroit dira eguerditik zazpiak arte, gelditu gabe kantua kantuaren ondotik arizan zirela… Artetik, bazkari goxo bat eginez gainera !

Kantuen hitzak proiektatuak izanen dira paretetan, ariketa zinez errexten baitu horrek berak. Musikari lagun Laura Perez eta Kuntzulu hor izanen ditugu ere.

Bazkaria 22 €tan da, eta izena eman behar da aski goizik edo imeil honi erantzunez edo J Claude-i deituz : 06 84 17 31 40.

POTEO ALAITUA 03/29an

Ostirale astirian, 6ak30 7etarik aitzina, DONAPALEUko merkatu tokitik aitzina, KORRIKAko poteo alaitua izanen da ostatuz-ostatu eta karrikaz-karrika, MUSUTRUK txarangarekin.

Beste ekimenetan :

Jadanik badakigu KORRIKA TTIPIn Amikuzeko 400 haurrez goitik parte hartuko dutela.

Izanen da ere, azken aldietan usatu giren bezala, KORRIKA egunez egun segitzeko mapa argiztatu erraldoi bat turismo bulegoan.

Apirilaren 4an iganen da KORRIKA DONAPALEUn, goizeko 10etan. Goizetik hasiko da pesta eguna, eguerditan bazkari batekin eta arratsaldean animazioekin.

Ondoko egunetan xehetasun gehiago.

Artikulu hunen zolan Korrika kilometroz-kilometro Amikuzen gaindi noiz pasatu zen eta norek hartu duen lekukoa aldi bakotx ikusiko duzue. Aldiz denak igurikatuak ginen Donapaleu barnean. Usaian ere, ikusgarria izaiten da memento hori, jendetza ederra biltzen baita, euskaltasuna ohargabera destinatua duen city honetan.

Haatik, aurten ere, zerbait erran behar eta, kritika zaharra berriz axalera jin da : zendako demontre, nun eta hemen bakarrik, ximixta bezala behar du Korrikak Donapaleu pasatu, hartu eta utzi, kleenex bat bezala ?… Aurten gainera, ibilbide ofizialean bi itzuli markatuak ziren, eta horrek lasaituak gintuen aitzinetik, bainan ez, kamiona joan da xuxenka bigarren itzulia egin gabe… eta piesena, guk segitu!
Aipatzen da, xutxumuxuak baizik ez dira oraino, bestaldian Korrika desbideratu beharko dugula, eta orduan segur, bi itzuli eginen dituela Donapaleun, eta nork daki, gustu hartu ondoan, aitzineko aldietan hutseginak ere ez dituenez egin beharko !!!

Horiek hola pesta kausitu ginuen halere, Korrika pasatu orduko arrultze ta xingar ohargarri batekin askaldu baiginen merkatu estalian bertan, kantu artean eta omore onean, egin behar dena ongi egina denaren sendimenduarekin. Gau eskola, gaztetxea eta Zabalik-i esker.

Zango sagarretako minak sendatu dira geroztik eta bihotzeko bozkarioak oraino hegalak emaiten dauzkigu egunerokoan. Balio baitu gure lanak, balio baitu gure temak, balio baitu gure hautuek ekartzen dauzkiguten plazerren partekatzeak adixkide eta ezezagunen artean. Eta balio bailuke Donapaleu behar bezala inguratzea euskararen korapiloari ezikusiarena ez egiteko gisan…

Apirilaren 9an, Iruñera heldu zen eta han zen lekukoaren mezua leitu. Aldi honetan Joseba Sarrionaindiak zuen idatzia eta honek ere, holakoetan usatzen den bezala, mezu zuzena eta ongi pizatua helarazi zaukun. Hona hemen bere testo osoa :

« Alfabetatzearen, euskalduntzearen, ikastolen, euskara batuaren, literaturaren,prentsa idatziaren, irratiaren, telebistaren, eta KORRIKA askoren ondoren, azken berrogei urteotako biziberritzearen ondoren, euskararen aldeko mugimendua egonkortu egin dela esaten da, normaltasunaren alde aurrerapauso handiak egin eta normalitate moduko batean lasaiturik edo trabaturik gelditu dela euskaraz bizi ahal izateko asmo kolektiboa.

Euskararen alde egitea normaltasunaren kontra egitea da oraindik. Aukerak eta maukerak egin behar izaten ditugu euskaraz bizi nahi dugunok. Belaunaldiak daramatzagu behetik gora elkartzen eta ekiten,  erresilientzia honetan, goitik behera ezartzen zaizkigun lasaigarri kulturalak eta traba politikoak gainditzeko. Badugu motibo bat: badugu altxor partikular bat balio unibertsala duena, ispilu batean bezala islatzen dela bizitza hizkuntzan. Hizkuntzan ikusten du bere burua edozein pertsonak zein komunitatek, oharkabean bada ere, eta hizkuntza kaltetua ispilu apurtua bezalakoa izaten da.

Hizkuntza bat desagertzen denean, mundu guztiak galtzen du bizitza ikusteko eta azaltzeko modu berezi bat. Balioa du norberarena denean eta beste batzuena denean ere bai. Euskara, beste hizkuntzak bezala, altxor unibertsal bat da, denona delako, agortzen ez delako eta dohainekoa delako. Denona da, dena pribatizatzen ari den sasoian. Ez da agortzen erabiliz gero, gauza gehienak erabiliz gero bota behar izaten diren egunetan. Eta dohainik erabiltzen dugu, gehien gehiena ordaindu behar izaten denean. Euskara noranahikoa da, baina gutako bakoitzaren baitan dago. Lapur altxorra balitz bezala edukiko dugu zulo ilunen batetan ezkutaturik?

Konturatzen zara goizetan ohetik jaikitzean ezti tanta gozo bat bezala senti dezakezula ezpainetan? »

Apirilaren 3an astelehenarekin

20. Korrika – AMIKUZE – Lekuko eramaileak

 Donapaleuko Zineman, Apirilaren 7an, Aratseko 8ak terditan.

Euskal Harriaren ABD-ak filma hedatua izanen da. Aintzinetik, amikuztar parte hartzaile taldeak, proiektua aurkeztuko digu. Elkarte eremailearen ideia,proiektuaren abiatzea, nundik norakoak, baita haien parte hartzearen berri… Ondotik ere, elgarrekin mintzatzeko parada izanen da.

Euskal Harriaren ABK-ak zer da ??

Euskal Harriaren ABDak, Euskal Herriko 26 zuzendarik egin beldur, zientzia fikzio eta fantasiazko laburmetraiez osatu film kolektiboa da.
Denetarik atxeman daiteke Euskal Harriaren ABDak film kolektiboan. Zinegile profesionalak edota lehen aldiz kamera bat hartu eta labur bat grabatzeko abenturan murgildu diren animatu inkontzienteak. 2014eko udan euskal alfabetoko 26 hizkietako bat egokitu zitzaion bakotxari eta hizki horretatik abiatuta, laburmetrai bat egitea galdegina zitzaien. 7 probintzietako zinegileak, bakoitza bere aldetik lanean, 26 laburmetraiez osatu film bat osatzeko. Jarri zitzaizkien baldintza bakarrak: laburrak euskaraz grabatzea, euskal elementuetan oinarrituak egotea eta goitik behera, Euskal Herrian ekoiztuak izatea.

Kasu !!! filma hau, ez da publiko gaztearentzat egokia…