Ihauterien aroa dugu. Europa zahar guzian, eguberritik martxo apirilera arte, konfunditzen dira eguberri, urtats eta ihauterien aroa. Olentzero bera ez da zirtzil hastial eta zikin horietarik baizik, abertzaleismo neo-klasikoak papa-noeltzen duen arte.

Hemen, Baxenabarre deitzen den lurralde huntan, Santibate eta Libertimenduak bereizi ditugu. Garazi aldean famatuagoak dira, baina lekukotasunak bildu-doi Banka kaskoan, nola Oztibarre aldean, hala Amorotzen gaindi ere jakiten dugu etxez-etxeko eske-kantuaren errituala egiten zela joan den mende hortan gaindi.

Dena dela, duela 7 urte (arra)hasirik, aurten ere Amikuzeko gazteri batek bi hitzordu finkatu ditu.

Lehena Santibate, helduden urtarrilaren 24an iganen da. Azken 4 urteetan bezala, gazteak maskaturik ibiliko dira Donapaleuko karriketan « Santibatek andere… » kantatuz, bertsuak botatuz eta ahoratzen ahalko dituztenetaz asez, leher eta zapart egin arte. Kasu, hau ez da ikusgarri bat, bizitzeko gauza bat baizik ez, eta gazte zirtzilez eta zirtzil gazteez kanpo, nehor ez da gomit ! Lekuan berean eskertuko dituzte Donapaleuko ostalerrak eta elkarteak beren bihotz onarentzat (eta prefosta, madarikatuko atea idekiko ez dietenak oro!).

Handik  2 aste, Libertimendua izanen dugu. Otsailaren 8a, igande goizeko 9ak30etarik aitzina, karrika ibilaldiarekin abiatuko dena. Burgaintzi eta Iruski taldeetako bolant mutiko eta neskak jadanik antrexanten trebatzen ari dira. Amikuzeko txaranga ere aire berrien ikasten, dantzariek manaturik! Ez dira segurki kikiltzekoak zirtzil ahobero eta ahalgezungarrien aintzinean, eta aurten ere fida dira fueratuko dituztela kalapita egileak gure hiri kapitaletik, bakea eman dezaten helduden negua arte bederen…

Pesta haundia izanen ahal da aurten ere, eta jadanik zuen izenak emaiten ahal dituzue bazkarirako (edo hemendik beretik, edo deituz 06.81.51.96.83).  Kantu, bertsu eta gazteri beroa segurtatuak dira.

Antzerki munduan Federico Garcia Lorcaren « La casa de Bernarda Alba » ezaguna da : alarguntsa bat bere bost alabekin borrokan, giro ilun batean, autoritatea libertate nahiaren kontra.

ZURRIOLAko Antzerki Eskolak bertsio bat egina du bere maneran, « Bernarda klownaren etxea » deitu duena, ironia, irria eta alegrantziaz desformatuz obra originala.

Huna beren hitzetan nola aurkezten duten obra hau :

« Bernarda Albaren Etxearen, klown estiloan landutako bertsio bat da. Pertsonaiek bere esentzia gordetzen dute, baina klownaren eraginengatik, disparatzen dira, handitzen dira, erotzen dira, eta muntai alai eta dibertigarri bat osatzen dute ».

Zuzendaritza : Joxerra Fachado

Taldea : Zurriola antzerki eskolako LAGA taldea

Emanaldiaren eguna : 2014ko azaroaren 29an, ibiakoitz arratseko 8ak 30etan Altzumartako pesten gela berotuan

Zurriolako Antzerki Eskola (ZAE) Donostiako Zurriola ikastolan kokatua da. Haur adin guziek antzerkia jastatzen dute Joxerra Fachado irakaslearen lan ikaragarriari esker. Astiritan aldiz, burrasoak dira taulagainera hurbiltzen eta lau taldetan prestatzen dituzte antzerkiak. Altzumartara hurbiltzen den taldea astelehen astirietakoa da, eta umore goxoz, klownen maneran bi irri eginaraziko dizkigute.

Ttikitatik antzerkia barruan duen talde bat dator Amikuzera, Zurriola ikastolan antzerkia oinarri bat baita haurren hezkuntzan. Zortzi urteetatik goiti matematika eta ingelesaren mailan dagoen ikasgaia da antzerkia. Mimotik hasita, urtero antzezpenaren arlo desberdin bat lantzen dute, aktore dohaiek pertsona mailan ere garapen bat bultzatzen dutelako. Filosofia horren adierazle nagusiak datoz txanda honetan, esperientzia gehien dutenen taldea, guraso eta ikastolako irakasleez osatua. Clownak bihotzetik hitz egiten du eta horretarako zer da egokiago drama haundi bat baino! Bernarda Albaren etxean ez da berri onen sasoia, baina clown baten ikuspuntutik begiratuta gauza guztiak hankaz gora jar daitezke. Zer gertatuko da hainbeste emakume clownekin? Drama izanen da, komedia edo intriga? Batek daki! Argi dagoena da ikusi beharreko istorioa izanen dela.

Ikus ZAEko webgunea hemen. Hortik barna promenatuz, sekulako perlak atzemanen dituzue.