Aro xirtxila zen Maiatzaren 26ko goizean goiz, justu jendeak ohetik kanpora begiratzeko mementoan, ea balio zuenez Behaskaneko aintzirara joaitea, ala hobe zen bero-beroa mihise pean egonik. Ondorioz, jende gutiago hurbildu zen aurtengo ediziora. Halere, joanb zen andanari, ez zitzaion dolutu, 8etarik aitzina ia ez baitzuen euririk egin Behaskane, Berrueta, Lohitzune, Sorhapuru eta Larribarreko gain eta zoletan.

Aurtengo berrikuntza gainera, norabide lasterketa zen, eta dotzena bat ekipak parte hartu zuten. Gaineratikoetan, izan oinez ala pirripitaz, usatukoaren erdiak zuen parte hartu nunbait han.

Aroa ez zenaurten alde, baina jadanik hitzordua egina da beste urteko, eta ustez aro onarekin!

2019ko ibilaldia igandean dugu, beti bezalaBEHASKANEko aintziratik abiatuz. Lau molde izanen dituzue parte hartzeko : oinezkakoa 11 edo 19 kmekin, pirripitazkoa 32 kmekin, orientazio lasterketa binazka eta haurren korrikleta.

Izen emaiteak 7ak30etan dira, eta abiatzeak 8ak30etan. Eguerditan haurrentzat animazioak izanen dira, taloak eta edateko nahikoa, zango-sagarrak pausatzeko estakuruan.

Xehetasunak eta ibilbideak hemen dituzue:

Joan den ekainaren 11ko egunaldiak arrakasta pollita bildu du, antolatzaile ziren Ikastola eta Zabalik elkartea pozteko gisan. Goiz-goizik Behaskaneko lakuaren inguruak harrotzen hasiak ziren, eta txirrindulaz ala oinez, multxo ttipika ala bakarka, jendea abiatzen zen kolorezko xingoleri segi, mota bakoitzak ibilbide luze edo laburragoa, errexa edo zailagoa markatzen baitzuen, Lohitzune eta Domintxineko « kaskoetan » gaindi. Bide erdi, askaria hartzeko manera aurkitu zuten denek, hori ere kirolaren parte baita alabaina. Gisa hortan, 80 txirrindulari eta 105 oinezkakoek parte hartu zuten. Goiz undarrera, haurrendako zoin-gehiagoka ttipi batzu antolatuak ziren lakuaren inguruan, gehituak ostatuan eta talo jaten artzeko artetik.

Ohartzen gira, emeki-emeki, gertakari hunek bere manera atzemaiten ari duela, eta jendea ere urtetik-urtera lasaiki egoiten dela ondotik kalakan eta goxatzen.

Huna haurren lehiaketen emaitzak :

2005-2007 artekoetan :

• mutikoetan : Xabi Castege – Mikel Hiraboure
• nesketan : Argitxu Arburua – Kattin Fourcade
• mistoan : Anaïs Récalde – Patxi Barteborde

2002-2004 artekoetan :

• mutikoetan : Iban Iceaga – Bastien Brisé
• nesketan : Idoia Iceaga – Emma Vignau

Antolatzaileek laguntzaile izan dituzten enpresak eskertzen dituzte, horien artean Oihanburu eta Etxegintzakoak bereziki.

Ondoko urtera arte, dudarik gabe.

Gauza seriosetan, izen emaiteak goizeko 7etarik aitzina hartuko dira bizikletazkoendako eta 8etan oinezkakoendako. Kafea edanik, multxo bakoitza bat bestearen ondotik abiatzen ahalko da :

– 35 kilometrokoa bizikletan, 1000 m desnibeletan, 9€ko parte hartzearekin,

– 23 km bizikletan, 700 m desnibeletan, 9€ko parte hartzearekin,

– haur eta gazteentzat, birazka, oinez eta bizikletan lakuaren itzuli bedera edo bina, 5€ko parte hartzearekin (kirol lizentzia edo mediku agiri bat ekarri behar da haatik),

– 12 km oinez, bakoitzak bere urratsean, 7€ko parte hartzearekin.

Ibilbideak markatuak izanen dira, eta askariak han-hemenka banatuak  ibilaldi bakotxarentzat. Oinezkakoentzat, jaz ikusi ginuen batzuk konpetizio urratsean egiteko ideia badute, beste batzuk promenada hori bazterren ezagutzeko eta batzu besteekin solasean aritzeko baliatzen dutela. Biak posible izanen dira aurten ere. Euskaraz prefosta!

Ikastolak 2015ean antolatu zuen pilota partidako argazkia

Eskoletan eta pilota elkartearekin lan eginen duen kirol animatzaile berri bat hautatu du Amikuzeko Herri Elkargoak : pilota jokoa ezagutzen ez duena eta euskaraz ez dakiena. Aurkeztu ziren kandidatetan euskaldunak eta pilotari konfirmatuak baziren alta. Baina diploma osoa ez zuten ! Aitzineko kirol animatzailea, diplomaz postan zela jabetu zen bizkitartean ; oraingoan Herri elkargoko buruzagiek ez dute bide hori hobetsi. Duela zenbait aste Gabadiko auzapez eta pilota arduraduna den J. Louis Prebendek bere harridura agertu zuen auzapez guzieri igorri gutun baten bidez. Entzun ahal izan ginuen Irulegiko Irratian. Aldi huntan, Ikastolako burraso eta erakasleek beren kexua gutun bidez helarazi diote Herri elkargoari. Azkenik, Pilota elkarteak artikulu bat argitaratu du Donapaleuko kazetan. Ikastolako gutunaren eta Pilota elkartearen artikuluak transkribitu ditugu hemen.

Ikastolak igorri gutuna Herri elkargoari :

« Amikuzeko Ikastolako burasoen elkarteak, langileek, erakasleek, gure haserrea jakinarazi nahi dizuegu hautatu duzuen kirol animatzaileari buruz. Azken urte hauetan, Herri Elkargoaren hautuz eta xedez, Ikastolak kirol animatzaile euskaldun bati esker jokoak eta kirolak euskaraz landu ditugu. Ohartu giren bezala, zuen hautua joan da Euskal Herriko kirolak menperatzen ez dituen batengana eta bereziki euskaraz mintzo ez den batengana . Postu horrentzat, bi betebehar hauek ez kontutan hartuz, erakusten diguzue gure kulturari, gure hizkuntzari emaiten duzuen axolagabetasuna, ber mementuan gero eta gehiago familiek nahi dutelarik beren haurrek euskara ikas dezaten, bizi diren lekuko kultura ezagutuz eta beren erroak finkatuz. Bestalde, Euskal Herriko beste Herri Elkargoek, langile elebidunak enpleatzen dituztelarik, euskararen ikasteko aukera emaiten dutelarik (lan tenoretan euskarazko kurtsoak proposatuz), euskara beren estrukturetan sartzen dutelarik ( igeriketa kurtsoak euskaraz Miarritzen, haurzaindegiak euskaraz), Amikuzeko Herri Elkargoak alderantziz egiten du, euskara baztertuz.
Guk, ikasleek, burasoek, langileek, erakasleek, zuen herrialdeko kideok,
EUSKARAZ BIZI  NAHI DUGU
2016ko azaroaren 28an egina.
Amikuzeko Ikastolako Lehendekaria eta Zuzendaria »

Pilota elkartearen artikulua Donapaleuko kazetan 2016/12/23an argitaratua (erredakzioaren itzulpena) :

« Amikuzeko pilotazale guzieri

2016ko urtea bururatzera doa, gure klubarentzat ekarri dituen satifamenduekin, ainitz ekipek xapelgoetan azken mementoraino kalifiatu izanik eta batzuk irabazi xapelen gatik, bainan ere ekarri dituen desilusioneekin.

Eta horietan handiena, Amikuzeko Herri Elkargoko hautetsi handiek izendatu duten kirol animatzailearena, zeinak pilotako jakintzarik ez duen batere eta ez den hemengoa, Jean Frantxua Altxurrunen ordezkatzeko, erretreta hartua duenaz geroz joan den urritik aitzina.

Alta postu hortan lehiatzeko 4 gaitasun galdeginak ziren : eskoletan jarduteko habilitazionea izaitea, eskola orenetan bezala peri-eskolarretan, aisialdi zentroaren arduraduna ordezkatu ahal izaitea, pilota klubaren baitan lan egitea pilotari gazteen iniziazio eta hobekuntzan.

Alta postu hori Errekart lizeoak eta gure klubak sortua zuten duela 18 urte, Kontseilu Orokorraren laguntzarekin eta orduko gure herri elkargoko hautetsi handiekin, pilotaren geroaz grinaturik, zeina zen berentzat gure herriko ondare eta kulturaren zutabeetarik bat. Hastapen hastapenetik, kirol animatzailea gure klubean aritu zen astean 12 orenez, gure gain zelarik parte hartze hori herri elkargoari ordaintzea.

Alta gure klubeko bi kide kandidatetan ziren, bata delarik Antton Amulet, Oztibarreko herri elkargoan postu berdina duena partez. Ez dira atxikiak izan ez bat ez bestea, ez zutelakoan lurralde funtzioko titular diplomarik, dakigularik diploma hori barne konkurtsoz lort daitekela postuan sartu ondoko 6 urteetan.

Pilotan berezitua ez den kirol animatzaile bat hautatzearen ondorioz, eskoletako haurrak gutiago ekarriak izanen dira pilotarat, beste kirolak ere present baitira peri-eskolar animazioetan. Eta nola beste kirol horiek gurea baino mediatisatuagoak diren, beldur gira esku-huska eta nexken pala eskoletarako izen emaiteendako, eta orokorki pilotaren geroarendako Amikuzen.

Joan den azaroaz geroz, J Frantxua Altxurrunen ordezkatzeko klubean, Florian Mendibururen gainen kondatzen ahal dugu, ordu arte programatuak ziren bezala segurtatzen baititu iniziazio eta entrenamenduak, eta hori, bere egoera profesionalak ahalbidetuko dueno. Eskertzen dugu jakinki egoera hau egunetik biharamunera alda daitekela. »

« Eguberri on eta urte berri on (jatorrizkoan euskaraz)  »

Hemen klikatuz, Pello Zubiriaren komentario labur bat mintzaldiaz Argiako webgunean.

aipatzekoa dugun gaia…

Arratsaldean, Dantzaz Konpainiako lau dantzari jin ziren Ikastolara: Richard (Norbegia), Josu (Irun), John (Inglaterra) eta azkenik Gilles (Belgika). Lehenik, haiekin berotu ginen eta dantzan hasi ginen. Gero, koregrafia bat asmatu ginuen.
Biziki untsa zen. Koregrafia biziki polita muntatu dugu. Bi dantzari inglesez mintzo ziren, beraz piska bat trabagarria zen baina irringarria ere.

Amikuzeko ikastolako 4 eta 5. urtekoak

Hona bere hitzetan artikuluaren pasarte hau : « (…) Baina Ipar Euskal Herrian erronka ez da euskararen «babestea», biziberritzea salbu. Eta nahi ala ez, borondate onaren gainean oinarritua izanki, ezagupen legal gabeko politika publikoak beti iritsiko dira haien mugara. Legerik gabe ere asko aitzina gaitezkeela diotenak egia ezkutatzen duen formula baten gibelean gordetzen dira. Azken batean, koadrorik gabe, toleratuak besterik ez garelako. Ilegalak? Ez arras; okerrago: alegalak.  »

Alegalak ! Gogora ekartzen dauku, Amikuzeko ikastola berria babes legalaren pean eraikitzeko eraman trahola horietarik batean, behin, tokiko eta urrunagoko hautetsi mota guziak tokira ekarrarazi genituela, lekuan berean ohar zitezen eraikuntza berriaren behar-gorriaz.

Nicole Péry, orduko deputatu sozialixtak zuen formula bota : ikastola berria eraikitzeko prestatzen ari den muntaia ez da ilegala, alegala baizik !

Ilegala izanen zen, bistan da, diru publikoa ezarri baitzen eraikin berrian, baina egin da halere. Alegalki. Eufemismoa erabiltzearren.

Ez gaitu legala egin afera honek, irabazi duguna, ikastola berri bat eta legal ixtorioetan i-tik a-ra pasatzea. Ez da guti! Ez da aski ere!

Eneko Gorriren artikulu osoa hemen klikatuz aurkituko duzu.

7-tan : Telletxea – Mendiburu (Amikuze) / Lascor – Lucu (Oztibarre)

8-tan : Xala – Ducassou / Larralde – Bilbao

Ondotik : Talo ta xingar.

Trinketean ari direnen artean hiru pilotari hoberenak dudarik gabe, ta ezker paretan aspaldi huntan afitxa goi-goian dena bestalde. Partida paregabea ikusteko parada izanen dugu, eta alderdikeriarik gabe erran dezakegu, Donapaleun, Euskal Herriko trinket ederrenean!!

Angelun partida berdina jokatu zuten duela zenbait hilabete, ta ikusgarriak ez zituen esperantza guziak ase!! Dudarik ez oraikoan, Yves ta Battitta-k, ez dute motibaziorik eskas ukanen mendekatzeko. Baina parean ez da nornahi, Peio ta Bixintxo, aurtengo trinketeko txapeldunak!!!

Pilotazale ta Euskalzale, hitzordu hau ez duzu hutsegiten ahal!!!

Abenduaren 4ean, denak Donapaleuko trinketera, pilotaz gozatuz, Amikuzeko Ikastola sustengatzera!

Hementxe, Angeluko partidaren bideoa…