Bi urtetarik egiten den urtaroa berriz hor dugu. Amikuzen ere zenbait proposamen eginak zauzkigu.

Bizkarsoro filma eta mahai-ingurua : Donapaleuko zineman azaroaren 23an, 18:00etan. Eusko monetak antolaturik. Mahain inguruan parte hartuko dute Idurre Eskizabel eta Ttittof Betbederrek.

Itzulera antzerkia Dejabu konpainiarekin : Donapaleuko zineman, azaroaren 28an, 20:30etan. Kitzikazank eta Zabalikek antolaturik. Xehetasunak beherago.

Donapaleuko bisita gidatua euskaraz : azaroaren 28an,  13:30etan. Turismo bulegoak antolaturik. Izenak eman 05.59.65.71.78.

Oihaneko pianoa ikusgarria, eskoletako 3 eta 6 urteko haurreri zuzendua : Patrick Larralde eta Etxe-ren eskutik. Azaroaren 28an, 10:30etan eta 14:00etan zineman. Donapaleuko herriko etxeak antolaturik.

Haize beltza nobelaren aurkezpena Amaiur Epherrekin. Donapaleuko mediatekan, azaroaren 29an, 10:00etan. Ikus xehetasunak beherago. Zabalikek antolaturik.

Bestalde, Amikuzeko poloan, hautetsien bilkura euskaraz eginen da azaroaren 26ean.

ITZULERA

 Dejabu Konpainiaren Itzulera komedia honetan, hiru kideek, Ainarak, Urkok eta Mirenek, Mexikora egiten duten bidaia kontatzen daukute. Beren eguneroko gorabeherak jarraikiko ditugu umorez !

Sartzea lekuan berean. 15 €usko.

Ikusle baten komentarioa : Antzerki hau Cancuneko hondartza xurian edanen duzun cocktail paregabea da. Koloretsua bezain tronpakorra. Bainan lasai, ez dizu nehondik ere buruko minik emanen, arin eta alai sartuko zira etxera pentsatuz : «zoin epela den azaroko haizea Mexiko aldean! » 

2016 huntako Urriaren 14an, ostirale arratseko 8ak 30etan, Donapaleuko zine-konplexan, Egunkariaren sortze abenturaren mirakuilua kondatzen duen dokumentala ikusiko da. Emanaldi hortara, dokumentalaren sortzaileetarik ere hurbilduko da, ondotik publikoarekin solasaldi bat izaiteko.

Euskaldunon egunkaria, bortizkeri artean eta zuzenkontra hetsia izan zen sortu eta 13 urteren buruan. Denek dakigu hori. Hemen gaia ez da hori, nola sortu zen, nolako ilusioekin abiatu ziren abiatu zutenek, zenbatetaraino ahal guti eta gogo handiarekin kausitu zen pario hori. Oraindik ere bere fruituak emaiten ditu egungo egunean, gure hizkuntza nazio mailako eremuan kokatzeko urrats garantzitsua izan baita dudarik gabe, hizkuntza batuaren adostea edo ikastolen hedatzea izan den bezala.

Ostirale arte.

Argitze elkarteak eta Zabalik-ek antolatua Baxenabarreko euskararen urtaroaren baitan.

Telethon bati konparatzen badugu, ahul aire emaiten du agian, baina euskararen presentzia bizi publikoan neurtzen badugu, ainitz dela erraiten ahal ginuke.
Alabainan, biziki-biziki urrun gira hizkuntzaren normalisatze arrunt batetik. Egiten diren urratsak biziki herabeak dira, sinbolikoaz satifatzen gira (ez bada espantuka artzen) maiz… eta anartean hizkuntza ura erhien artetik bezala eskapatzen ari zauku, belaunaldi xaharrak hil arau. Gazteak kopuru ttipiegietan eta hein apalegietan euskaraz eskolatzen ditugu eta hizkuntzak dentsitate minimo bat ez du ukanen bere burua erreproduzitzeko.

Helburuen eta baliabideen arteko desoreka hortan gure burua galtzeko arriskuan ari gira beraz Euskararen urtaroa muntatzen, hizkuntzaren kontrakoen indarrak neutralisatu nahiz eta aldekoen indarren sinergia (nihundik ere beharrren heinekoa ez dena) lagunduz.

Huna Amikuzeri doakionez, zein diren proposatu hitzorduak, urri huntan :

– 14an, arratseko 8ak 30etan zineman, « Gaur irekiko ditu ateak » filmaren proiekzioa eta ondotik bi solas egileekin (Argitze eta Zabalik)

– 15ean, arratseko 8etan, Gabadiko eskolan, herriko haurrak eta Pil Pil taldea (Gabadiko herriko etxea eta eskolako burrasoen elkartea)

- 16an, goizeko 9etan, lehengo frantxixkanoetarik, ibilaldi gidatua Izuraraino (Izura Asmeko herriko etxea)

– 16an, arratsaldeko 4etan, zineman, ikusgarria Zarena zarelako dantza konpainia eta Zazpietan lehena jota kantariak (Donapaleuko herriko etxea)

– 17an, 11etan, Amenduzen, haurrentzat pista jokoa (herriko etxea eta Bil ta Garbi)

- 22an, arratsaldeko 3etarik aitzina, Arberatze Berroan, « Etxea eta etxekoak » margo erakusketa eta hitzaldia ondotik 5etan (Arberatze Zilekoako eta Behaskaneko herriko etxeak)

– 22an, arratsaldeko 5etan, Aiziritzen, Xilabako finalerdia, ondotik jateko eta edateko (Bertsularien lagunak, Aiziritzeko herriko etxea, Zabalik eta ikastola)

- 26an, arratsaldeko 3etan, Aiziritzen, margo tailerra haurrentzat (herriko etxea)

- 29an, goizeko 10ak 30etan, mediatekan, Itxaro Bordak bere heroinaren abenturak eta bere gogoetak aurkeztuko ditu, eta Amikuzeko bertsu eskukulako bertsulari aprendizek oihartzunez kantatuko diote (Mediateka, Manex Liburutegia eta Amikuzeko bertsu eskukula)