Amikuzen bildu gira egitarau baten moldatzeko. Hona zein diren hitzorduak :

05/06ean, Tailerra burrasoentzat, PLAZARAko formatzaileekin, Touzaa etxean, Elorri Garat eta Xan Airerekin.

 05/16an, ostiralez :

• 10:30etan, Donapaleuko bisita gidatua euskaraz. Izena eman bezpera arte Donapaleuko turismo bulegoan. Alexandra Larraldek Donapaleuko karrika eta historia deskubriaraziko dizue.
• 18:30etan, EUSKARALDIAren ibilaldi burrunbatsua Donapaleun gaindi : joaldun, zigante, txaranga, kantu, bertso, dantza eta aldarrikapen mezuak. Egin ahala izaitera entseatu behar dugu, umorez eta determinazioz erakuts dezagun hau euskararen herria dela lehenbizi.
• Jarraian, Merkatu estalian, besta eta txapen banaketa : kantu, bertso, dantza, talo eta edateko…

 05/17 eta 18an, 15:00tan, Basatiak marrazki biziduna Donapaleuko zineman

05/22an, ostegunez, 20:30etan, Ximinoa eta Olatuak filmak Itziar Leemans egilearekin, Donapaleuko zineman.

 05/24an, ibiakoitzez : 

• 10:00tan : idazleak mediatekan. Ekaitz Bergaretxe eta Bea Salaberrirekin.
• 18:30etan, Karaoke astiria Luma garagardotegian. 

Bestalde, joan den aldian Amikuzeko poloko gisan, Donapaleuko herriko etxeko bilkura itzultzailearekin eginen da Euskaraldi denboran.

 Txapen banaketa :

• Amikuzeko irratian, astezken edo ostirale goizez.
• Maiatzaren 16ko bestan, merkatu estalian, 18:30etarik goiti.

Izena eman ahal izan duzu ?

Norbanako ala entitate gisa, maiatzaren 25a arte duzu izena emaiteko. Aldiz izena interneten emana izan behar da txapa berreskuratzeko.

Hemen duzu izena emaiteko sargia :

Gau eta egun euskaraz bizi nahi dut, eta gauza bera egin dezakezu zuk !

Esne Beltza taldearen « Euskaraz bizi nahi dut » kantuaren hitzak ezagutu dituzu hain segur.

Mementoa jina da, 11 egunez asmo horren gauzatzeko. Euskal Herri osoan, heldu den maiatzaren 15etik 25era Ahobizi edo Beharriprest izan zaitezke. Bakoitzak egiten du bere hautua bere egiteko ahal eta nahiaren arabera.

Ez gehiago duda hemen klikatuz :> eman izena.

Estrukturalki plantan den sistemak gure hizkuntzaren desagertzea ekartzen du : legeak, botereak eta bere zerbitzariek indar itsu eta pizua dute gure egunerokoan.

Koiunturalki, erran nahi baita noizean noiz, indar erakusketa batzu egiten ditugu, gure hizkuntzari duintasun eta espazioak eskaintzeko, gure burueri ondarrean, hizkuntza hori gu baigira ! Maleruski gisa hortan,  beti arrahaste da, egiturazko babesgabetze horren pean, aldian-aldi hondartzako uhainen gisa aitzinatze eta gibeltze mugimendu etengabean baigabiltza.

Bizkitartean, hori egiten duguno, zerbait bagira, edo fatalitatearen kontra hala-holako harresia eraikitzen dugu. Euskara normal mintzatzea beti eta denetan erresistentzia ekintza bat da, bai eta bizitzaren aldeko urrats kreatiboa.

Euskaraldia memento horietarik izan dadin, antola gaiten eta parte har dezagun. Gutiz ez utz !

ZENDAKO IZENA EMAN EUSKARALDIAn ?

Euskaraz mintzatzeko fida zira ? edo euskaraz mintzatzen bazaizu ulertzen duzu ?

Orduan euskaraldiak proposatzen dituen bi roletarik bat hartzen ahal duzu.

Eta rolarekin konpromisioa hartzen duzu :

• ahobiziak 15 egunez ahal duen leku eta memento guzietan euskaraz eginen du, lehen harremana bederen,
• beharriprestak, bere txapa papoan, jakinarazten du euskaraz egiten ahal zaiola, bera ez bada fida ere beti euskaraz artzeko.

Zendako sino horiek guziak ?

Euskararen aldeko atxikimendua gorenean da garai hauetan. Egia da. Egia da ere, ez dela sekulan euskara hain guti entzun izan. Euskaldunak mutuak gira !

Helburua da atxikimendua gainditzea, eta erabilera bilakatzea. Hizkuntza ez da biziko ez bada erabiltzen. Ditugun ahalge eta politezia ustezko jokaera hilgarriak ez baditugu gainditzen, ez badugu adorerik aski girena giren bezala izaiteko, zendako bestek defendiatuko dute euskara ? Zendako burraso ez-euskaldunek haurrak euskara ikasten ezarriko dituzte ? Zendako jendea joanen da gau eskolara ?

Euskarak behar gaitu, eta behar dugu euskara, … erabiltzeko !

Orduan balia zite paradaz, emazu zure izena www.euskaraldia.eus webgunean, eta azaroaren 18an, zauri Donapaleuko merkatu estalira, 7etarik goiti, zure txaparen bila.

NOLA EMAN IZENA EUSKARALDIAn ?

Bi kasu :

- Joan den Euskaraldian izena eman zinuen : imeil bat ukanen duzu , berriz engaiatzera gomitatuko zaituena. Aski dituzu instrukzioak jarraitzea.

- Lehen aldikotz nahi duzu izena eman : jo ezazu euskaraldia.eus webgunera, eta proposatua den bidea jarrai ezazu

 Arigune izan zinteke ere :

Zure enpresan, elkartean, edo beste edozoin erakundetan, prest zirezte talde gisa euskaraldian engaiatzeko : erran nahi batzu Beharriprest beste batzu Ahobizi, denak ez bazirezte ere, prest zirezte zuen artean 15 egunez erabilera bultzatzeko, batzu mintzatuz, besteak behatuz.

Urriaren 31 arte duzue euskaraldia.eus webgunera jotzeko eta Arigune bezala zuen izena emaiteko.

EUSKARALDIAREN ABIATZE PESTA ETA TXAPEN BANAKETA

 Azaroaren 18an, ostirale astiriko 7etarik 11ak arte, Donapaleuko merkatu estalian igurikatua zira :

- Ahobizi eta Belarriprest txapak orduan banatuko dira,

- musika, dantza, kantu, margo, tindu, talo, xingar eta edateko izanen dira nasaiki.

Abia dezagun sozial ariketa erraldoia omore onean, 15 egunez segitzeko ber garrarekin, eta nork daki ? ondotik hala hala segitzeko gogorik hoberenean !

Gure bizitzak euskaraz tinda ditzagun nasaiki …

ANIMAZIOAK EUSKARALDI DENBORAN

 – 11/18an, Euskaraldia abiatzeko pesta Donapaleuko merkatu estalian, astiriko 7etarik 11ak arte

- 11/23 astezken egun guzian, mediatekan ikastolaren 50 urteen dokumentala buklean mediatekan

- 11/25ean, euskaraldiaren karabana Donapaleuko merkatuan

- 11/25ean, ikastolako burrasoen iniziazio tailerra eguneroko elkarrizketetan trebatzeko, 6ak30etan

- 11/25ean, Ganbeta ostatuan, Karaoke gaualdia, Donapaleuko herriko etxeak antolaturik

- 11/26 goizean, ikastolako 50 urteen dokumentala eta liburuaren aurkezpena mediatekan

- 11/29an, 6ak30etan, gela berdean, diktaketa publikoa Donapaleuko herriko etxeak antolaturik

- 12/02a, 7etan Donapaleuko Touzaa etxean, Zabaliken biltzar nagusiaren ondotik, Euskaraldiaren bukaerako aperitifa.

ABIATZE PESTA KAUSITUA

 Joan den ostiralean, Euskaraldia abiatzeko pestatxo bat muntatu zuten Amikuzeko batzorde antolatzaileak.

Batzorde hortan bildu gira Zabalik elkartearen inguruan, ikastola, gau eskola, gaztetxea, eta hainbat norbanako eskukaldi bat eman dutenak.

Bakotxa bere Ahobizi edo Beharriprest txaparen bila jiteko estakuruz antolatua zen pesta. Horrara eta, taloak bero-bero, edatekoa fresko-fresko eta animazio zerrenda aurkitu zuten, hortik iragan ziren 200 bat lagunek. 

Txalapartaren ttakun-ttakun-ek abiarazi zuten zeremonia, bertsulariek agurra egin, hitzaldiak gero (ikus webgunean), eta mutxikoak dantzatu aitzin, 4 kantu eman genituen denek batera.

Eskertzekoak dira hor parte hartu duten denak, musikari, bertsulari, laneko zirenak ostatuan eta taloetan, bai eta partaide guziak, biziki xinpleki eta giro lasaian joan baitzen dena.

Denen arteko elkarlanaren beharra badu gure xedeak, eta ikusten dugu bere fruituak ekartzen dituela, emeki bada emeki, baina den gutienez arraiki !

AMIKUZEN EUSKARALDIA zenbakitan

Ariguneak : 35

Izena eman duten norbanakoak : 143

Izena ematea galdegina zaigu, jakin dezagun zonbat giren, anitz izateak kuraia emanen digulakotz, horren beharrik ez badugu ere arrazoin dugula jakiteko. Ezen egunero euskara zokoratzen duten tsunamiek gutarik konbentzituenak kikiltzeko ahala badute. Hortakotz, 15 eguneko ariketa kolektibo honek, gure burueri « ahal dugula » frogatzeko balio izan behar du!

Izena ematea biziki errexa da, eta azaroaren 17a arte irekirik da hortarako bidea : jo ezazu euskaraldiaren webgunera, hementik barna !

2018/11/20an

Azken minutak gure buruen prestatzeko eta aho-beharri sartzeko jokoan. Usaien aldatzea da erronka. Usaien aldatzea neke da bakarrik bere xokoan, hortako, Esukaraldiak kuadro bat eskaintzen digu, komunikazio kanpaina bat multxoan abiatzea errexteko eta babes erlatibo bat jendea jakinean izanen baita. Erronka abiatzea da, lehenik 11a egunez, gero segitzeko usaia berrietan barnatuz. Euskara dakiten guziak ausartzen bagira honela, segur gure hizkuntzak presentzia handiagoa izanen duela bizi publikoan, segur normalisazio zerbait izanen litekela, beste jende batzu lot daitezkela hizkuntzari, haur eta gazteak, eskolan ikasiaren baliatzeko gehiago xantza izanez, gerorako hiztun izaten presta litezkela… Ez du honek dena eginen, baina lagun dezake.

Beraz, ez ahantz Amikuzen ditugun hitzorduak :

Ostiralean, azaroaren 23an 7etan Aldaka gaztetxean :

– ahobizi eta beharriprest txapen banatzea : gaurkotz 100 amikuztarrez goitik txapa ekarriko dute ; ez bazinu izena emana, ez da berantegi zuretzat ere !

– jarraian oren bateko tailerra eta ondotik aperitifa : nola egiten da lehen hitza euskaraz hartzeko ausartzia izateko eta dena ongi pasa dadin segurtatzeko ?

 Ondoko ostiralean, azaroaren 30ean, 7etan hitzordua herriko etxe aitzinean, Euskaraldiaren poteo alaituarentzat, Musutruk txarangarekin, gaiteroekin, bertsulariekin, eta zuen kantu liburuekin…

Eta egun guziz, zuen lanean, herrian, etxen, adiskideen artean, Donapaleuko komertzioetan, … lehen hitza euskaraz, prefosta !

2018/11/11an

Euskaraldiko hitzorduak gure aho eta beharrientzat !

Larrazken euskalduna beharra dugu! Euskaraldia Euskal Herri mailako esperientzia bat izanen da, Korrika den bezala. Euskaldun, nazio bereko partaide, komunitate linguistiko berdineko kide gisa, proiektu berdinean engaiatuko gira 11 egunez, azaroaren 23tik abendoaren 3ra, egun hori delarik euskararen nazioarteko eguna. Proiektu hori, lehen hitza euskaraz eman edo entzun nahi izatea da. Ez zen gutiago galdegiten ahal beren hizkuntzari atxikimendu zerbait agertzen duten herritarreri. Kontrarioa, agian egun guziz errexago egiten zaiguna – eta ez da hau kulpa norbanakoeri egozteko, ezen sistima oso batek baikaitu hortaratuak – lehen hitza euskaraz ez emateak edo entzun nahi ez izateak, hizkuntza heriotzara baitarama berant baino goizago.

Amikuzen ere lotuak gira mugimendu horri, eta zu ere gomit zira parte hartzera. Engoitik dakizu, bi posibilitate daude, bakotxak bere txapa espresa dutenak : ahobizi, lehen hitza euskaraz eman gogo dutenentzat eta belarriprest euskaraz lehen hitza entzun nahi dutenentzat, ez badira ere gai, oraindik, erantzuna ber moldean emateko. Diskriminazio mota horrek ez gaitu baitezpada asebetetzen, ber dinamikan sartzen diren jendeen artean bereizte ereduak berak, fokua interesa duen gunetik aldentzeko arriskua baitakar, preseski dinamika delarik inportanteena eta gakoa bakoitzaren ahalen eta kokaguneen tokiz aldatzea, beraz txapaz. Baina beude horretan gogoeta horiek, gaur ez dute lekurik, itsasontzia abiatua den bezala hartuko dugu, eta omore on eta begirunez bazkatuko, 11 egunez behin, urte osoan gero.

Elgarri mintzatzeko kurutzatu behar baita, zenbait hitzordu eta ekintza baditugu finkatuak Amikuzeko euskalgintzatik :

– lehenbizi, Donapaleuko hainbat komertsantek delako txapak erabiliko dituzte. Agian ez zenekiten euskarazko harrera egiteko prest zirela, eta joko pollita izanen da hauekilako harremana beste gisan egitea hemendik aitzina,

- azaroaren 23an, ostirale arratseko 7etan, gaztetxean gomita bero bat egina zaizue, oren bateko tailer batekin eta aperitifa pintxoekin ondotik. Orentto horretan, euskaraz lehen hitza hartzeko ditugun zailtasunetaz ariko gira, stress linguistikoa deitzen den mamu hori huxatzeko gai izan gaitezen aholku batzu emanez, adibidez, besteekilako hurbilpena umorez eta irriño batekin egiteak esplikazio linguistiko guziak balio dituela, edo beste hau, entzun nahi ez duenarekin tematzeak gure buruari egiten ahal diola gehiago kalte ezinez eta bereari… Zinez, parada guti dugu gai hauetaz elgarren artean aritzeko, okasionea baliatzekoa izanen da. Antolaketa errexteko, galdegina zauzue zuen izena ematea hemendik beretik.

– azaroaren 30ean, ostirale arratseko 7etan, Euskaraldiaren bigarren poteoa eginen da Donapaleuko ostatuetan, Musutruk txaranga, Amikuzeko gaiteroak eta tokiko bertsularien parte hartzearekin. Zuen kantu liburuak jarraikaraz balekibale !

Garantzitsua izanen da txaparen janztea, ezezagunekin harremana errexteko. Beren izena euskaraldiaren webgunean emana dutenek, emailez mezu bat izanen dute jakiteko nola eskuratu dezaketen. Besteeri gomendatzen diegu ahal bezain fite izena emaitea (webgune honetan).

Azkenik, inkesta bat egina izanen da parte hartu dutenen artean, emailez, antolatzaileek nahi baitute ikusi ekintzak ze ondorio duen, zenbateraino usaiak aldatuko diren, bai eta bildu nahi baitituzte ekintzari buruzko jendeen iritziak, ondoko aldi batendako hobekuntzak ekartzeko. Eskertua izanen zaizue inkesta haueri erantzun izana.

Elgar ikusiko dugulakoan…

2018/10/23an

Euskaraldia heldu da !

Badakizue zertaz ari giren ? Bagira zenbait, euskara mintzatzen dakigunak eta ez gira beti ausartzen, ezezagun lekuetan edo ezezagunekin, edo ezagun batzuekin ere beste usaia batzu hartuak ditugu, eta badakizu… usaien kanbiatzea ! Bagira beste batzu, zerbait ulertzen dugu, ez aski mintzatzeko, eta gehiago entzun nahi ginuke, edo ez ginuke euskaraz mintzatu nahi duena bortxaz frantsesez artzera behartu nahi gu hor girelakotz… Alta euskara entzun nahi dugu guk ere… Lehenak ahobizi deituko dira eta bigarrenak beharriprest, helduden azaroaren 23tik abendoaren 3ra iraganen den Euskal Herri mailako esperimentazio erraldoi hortan.

Bi funtzio horietarik bat bederen hartzeko prest bazira, gomit zira izena emaiterat webgune honetan.

Zendako izena eman ? Ez duzu komertzialik ukanen etxera, ez zaizu dirurik galdeginen crowfunding bat gehiagorentzat. Ez. Bakarrik da eguna jinen deneko, pins edo txapa bat helarazia izanen zauzula (Amikuzeren kasuan Zabalik elkartearen bidez) zuk hautatu duzun funtzioaren markatzeko : ahobizi edo beharriprest, eta sekula hori papoan promenatzen bazira, erran nahi luke automatikoki ulertuko dela zurekin euskaraz ari behar dela, ezagutu ala ez ezagutu. (Mmmmm… ezagutza berriak egiteko parada bat ? ;o)))

Iparralde mailan, 10000 izen emaite nahi luzkete gainditu. Are, denen artean heldu behar ginuke! Ez ?

Beraz egin segidan, minuta eskas bat aski da, eta hola ez duzue ahantziko… ;o)))