ZABALIK » eskukula

Taldekako XILABAren bertso afaria buruilaren 30ean, Amenduzeko eiheran

Zabalik elkartea — Tue, 19 Sep 2023 20:08:26 +0000

Aurten ere gai emaile, epaile eta antolatzaile anitzen laguntzarekin 9 taldetan banaturiko 38 bertsularik parte hartuko dute Taldekako XILABAn.

Amikuzeko Eskukula taldea Ez dok 5 taldearekin lehiatuko da. Buruilaren 30eko astiriko 7etarik aitzina gomendatua da hurbiltzea Amenduzeko eiherara, eta tokia atxikitzeko mezu bat utzi behar duzue zenbaki honetan : 06.81.51.96.83.

Eskukula : Ramuntxo Kristi, Pettan Prebende, Bittor Thikoipe, Paul Moal

Ez dok 5 : Maddi Sarasua, Battitt Kruspeire, Oier Urreizti, Xermin Kanblon, Joana Itziana

2019ko Xilaba Amenduzeko eiheran, bihi guziak eho zituzten !

Zabalik elkartea — Mon, 07 Oct 2019 20:05:54 +0000

Eihera bihiaren ehotzeko bada, bertsularitza idei(ar)en karruskatzeko izanen da, ustegabea eta ustegabe ongi jina nahitara ala nahigabe konbokatuz.

Holakorik bizi izan dugu 2019ko urriaren 11a huntan, bertsu afariaren karietara, Amenduzeko eiherako behitegi arraberrituan. Amikuzeko ESKUKULAko hiru lagun eta 4KOPLASARA taldeko beste lau, beren buruekin lehiatu ziren behatzaile andana berotuaren aitzinean. Azkenik, baina hori ez da ez interesgarri ez sinesgarriena, Sarakoek bildu zuten lehiaketan aitzina joaiteko txartela.

Saioa hastean, tokiko eiherzainak agurtu gintuen bertsotan. Hona hemen irudietan :

Ondotik bi taldeek beren agurrak kantatu zituzten, erdi irri, musikarekin edo gabe, hor puxka bat libroan ari zazikigu formatu huntan, bakoitzak bere burua laudatuz eta parekoak apalduz ahal bada.

Bi taldeetan, bertsulari konfirmatuak eta bertsulari aprendizak baziren. Baina, erran behar da azken hauetan aitzineko Xilabatik aldaketa sumatu dugula, eta sentsu onera, bertsuak aiseago jiten zirelako, eta ofiziotan egiazko elkarrizketak izan zirelako ere, usu bakarrizketa paraleloak izaiteko arrizkua delarik, eta batzutan, ideia batzuen txinpartak hunki gintuela.

Langintza guzietan bezala, esperientzia hartzeak bere bidea egiten laguntzen du, urratsez-urrats hobera joanez, bakoitzak bere baitarik egiten duen lana ahantzi gabe, eta bertso eskolako ariketak dira hortan ere bultzazaile.

Biba guziak beraz, izan Amets, Ramuntxo, Ellande, Pettan, Bittor, Julene ala Laida, gaualdira hurbildu ziren 80 afaltiarrek esku zarta beroekin eskertu zintuzteten. Eta, ez gaituzue sinetsiko baina, eiherako nazan lo ziren aingirak, gure txaloeri juntatu ziren ur azalean xapla-xapla eginez beren buztanekin …

Hona hemen bi taldeen agurrak. Saioko gehiago bertso entzuteko, jo ezazu hemendik Euskal irratietako PUNTTUKA emankizuneraino.

Hona J Claude Mailharinek kantatu bertsoak :

Alfer egonik sobera,

Hasi da ene galera,

Gelditzen ura,

Usteltzen zura,

Hilen ninzanez arrangura,

Kontsolatzeko ene tristura

Beti entzun dut Euskara!

Flako ninzen ta zaharra,

Galdua nuen indarra.

Moztu belharra,

Kendu naharra,

So zonbat nizan ederra!

Hemen nauzue mokofierra

Amenduzeko Eihera!

Oi koblakari mesedez,

Argi zak gaua izarrez,

Irin amentsez,

Ta bertso onez,

Nekez balinbada nekez;

Ene turrusta, bai atseginez,

Azkartuko duk nigarrez!

2019ko XILABA : Eskukula eta Ezkorbrutak taldeen agurrak Hazparneko Bob’s Beer-en, entzungai

Zabalik elkartea — Wed, 25 Sep 2019 14:57:20 +0000

Irailaren 21ean jokatu zen partida. Saio klase hortan, bertsu jarriak izaiten dira agur gisa – ala agurrak hala ote diren usaian ere ? – eta orijinaltasuna xekatzea dirudi dela jokoa. Hona nolakoak bota zituzten Hazparnen. Ikusiko forma hori atxikiko duten urriaren 11ko Amenduzeko saiorako. Araiz ba!

Bertsu sorta gehiago badituzue Youtuben, Bertsularien lagunak sustapena katean.

XILABA 2019 : saio bat Amenduzeko eiheran urriaren 11an

Zabalik elkartea — Sun, 15 Sep 2019 06:41:25 +0000

Irailaren 20an Itsasun hasiko da, eta 12 saio jokaturik azaroaren 16an Izturitzen bukatuko da xapelketa hau. Amikuzekoentzat, saio bat iganen da Amenduzeko eiheran, urriaren 11an, bertso afariarekin, astiriko 7etarik goiti. Nazan ez erortzeari kasu eman beharko da haatik ! ;o))

Tokiko Eskukula taldeak hor jokatuko du bere bigarren haitada. Lehena, buruilaren 21ean, ibiakoitzeko 7etarik aitzina duelarik Hazparneko Bob’s beer enpresan.

Lehen fasean 9 saio izanen dira, ondoren 2 finalerdi, eta final handia azkenik.

Aldi guziez 2 talde lehiatuko dira, eta finala aitzinekora arte entzulegoko norbait eta beste ligaxketako bertsulariak izanen dira epaile.

Zato zu ere zure lagun, ezagun edo herrikideak, sustengatzera, irri egitera eta txaloak jotzera… zu gabe ez baitira deus!

Huna, bixta ona dutenentzat, egitarau osoa hemen :

Altzumartako bertso afaria : bero-beroa!

Zabalik elkartea — Tue, 23 Oct 2018 19:04:08 +0000

Joan den urriaren 13an, taldekako Xilabaren estakuruz, bertso-afari bat izan zen Altzumartako gelan. 80 afaltiar, barne 6 bertsulari, Musutruk txarangak ere bazterrak alaitu zituela. Amikuzeko Eskukulako taldetik Ramuntxo Kristi, Bittor Tikoipe eta Paul Moal arizan ziren, eta Garaziko Otsoaren 7 umetarik, Miren Artetxe, Eki Perrier eta Oier Urreizti.

Gazte ainitz bazen jinik, batean isilik beha, bestean arrabots handitan beren esker on edo poza adierazten (afaritik landa zen ere!).

Garazikoak nagusitu dira, bilo mutur batez, baina hori zen gutiena, bertsoaren plazera eta tentsioa biziki ongi pasarazi baitziren, eta denentzat pozgarria izan zelako, giroak hori zuen erakutsi bederen.

Azken agurrean, Mirenek holako zerbait azpimarratzen zuen funtsean :

(Airea: Iparragirre abila dela)

Zinez saria da ikustea sala handi hau beteta

ta egiazko bertsolariak kantuz umorez taldeka

zinezko gozamena

jolasa da sormena

ez joaitea puntuen xeka

behar den guzia bertsoa baita ez lehia ta ez txapelketa