Amikuzek bere irratia ukanen du heldu den urtarriletik aitzina

Dena ontsa badoa, urtarril hasieran Amikuzek bere irratia ukanen du. Irulegiko Irratiak aitzinetik erabiltzen zuen frekuentzian, 94,2 MHz-ean, egun oroz lekuko aktualitatea aipatzeko lau oren hartu nahi lituzkete amikuztarrek, antena Irulegiko Irratiarekin eta, zabalago, Euskal Irratien sarearekin partekatuz.

Irulegiko Irratiaren bultzadarekin amikuztarrak dira xedea hausnartu eta prestatzen ari direnak. “Irulegiko Irratiaren kanpaina segitzen nuen, eta agertu zen Amikuzen geroz eta jende gutxiagok segitzen zutela irratia. Donibane Garazin denez, pentsatzen dugu amikuztarrek ez dutela haien irrati gisara kontsideratzen. Hori batetik, eta hizkuntzaren arazoa bestetik, geroz eta jende gutxiagok euskara ematen baitu, iduritzen zitzaigun irratia ez zela hainbeste segitua”. Pettan Prebende amikuztar gazteak egin analisia partekatua da. Horrek eraman ditu urratsa egitera.

Urtea baino gehiago bada xedea gogoetatzen hasiak direla, eta, interesa zuketen jendeak bilatzean, Aiziritzeko auzapez Chantal Ergi atzeman zuten: “Ideia aipatu dugularik, segidan ona iduritu zait. Amikuzen iduri zait beharrezkoa dela irratia hurbiltzea”. Irulegiko Irratiaren egoitza Donibane Garazin izateak traba praktikoak ere sortzen baititu amikuztarrentzat, Ergiren erranetan: “Grabaketak egin behar direlarik beti joan behar dugu Donibane Garazira; goizeko emankizunetan parte hartu behar delarik, 07:30ean han izan behar delarik ez da erraz”.

Irulegiko Irratiak, herrialdeko irrati izan nahi duen heinean, aspalditik darama Amikuzera hurbiltzeko gogoeta. 2002an jadanik, entsegu bat egin zuten. Amikuzen gaindi izeneko saioa egiteko, bulego bat hartu zuten Donapaleun, eta Kattalin Indaburu irratilaria han hasi zen lanean: “Helburua zen oren batez saio bat ematea Amikuzeri. Hango berriak aipatzen genituen; haien baitarik hurbiltzen zirenen abisuekin osatzen zen”. Baina garai hartakoak ez zuen iraun, eta hango ateak itxi zituzten. “Oraingo xedeari konparatuz mugatuagoa zen, zeren hor zinez beste lan bat egin dugu; arrunt sare bat osatzen ari gara hango jendeekin”, dio Indaburuk.

Berri emaileen sarea
Behin eta berriz juntatu dira gogoeta hasi zenetik, eta, sarea hedatuz doan heinean, parte hartzeko interesa duen jendea agertu da Pettan Prebenderen arabera: “Interesa bada, gaztetxean bai, kirol elkarteetan ere bai, besta batzordeak nahi gintuzke motibatu…”. Baina mugak ere badira: “Gazteetan dugun arazoa hizkuntzarena da. Amikuzen gutxi gorabehera 50 urtetik harat denek euskaraz badakite, baina gure belaunaldian euskaldunak atzematea eta gainera irratian mintzatzeko, ez da aise”.

Baikorrak dira, halere. “Nahikeria bat bada segur”, ziurtatu du Aiziritzeko auzapezak, eta, dena den, abiatu beharra argi du: “Zernahi gisaz ez bada parada ematen, ez da eginen”. Talde eragilean bereziki alde teknikoa lantzen ari da Jojo Bidart Irulegiko Irratiko langilea. Hark Hendaiako adibidea du gogoan, Gure Irratiak beste irrati bat sortzeko xedea ukan zuenekoa: “Antxeta Irratiak bere eskualdean hedadura azkarra ukan du; talde oso bat muntatu da han”.

Abuztuan hasi ziren txosten administratiboekin, baimena irailean ukan zuten, eta epeak zehaztu dira. Egoitza publiko bat bilatu zuten lehenik, baina Donapaleun ez omen zen. “Aiziritzen gela bat proposatzen genuen, baina Aiziritze ez da Donapaleu, ez da agerian”, Ergik zehaztu duenaz. Pribatura jo dute azkenean, kokapena hobesteko: Donapaleuko merkatu estaliaren parean izanen da egoitza. Hilabete hondar honetan eta abenduan egokituko dute urtarrilerako irrati estudio bat bilaka dadin.

Boluntario talde bat bildua da jadanik, baina ez dute lana bukatua, Prebendek dioenaz: “Zerbait interesgarri proposatzeko ahal bezainbat jende hunki nahi dugu”. Profesional bat ere izanen du Amikuzeko antenak, “jendeen arteko lotura egiteko”, Bidartek ezinbestekotzat baitu. Lanpostu eskaintza abendu erditsu arte irekia da.

Erran gabe doa Amikuzeko irratia abiatzeak gastu ekonomikoak ekarriko dituela. Euskararen Erakunde Publikoarekin eta Frantziako Irrati Libreen Elkartearekin laguntzak eskuratzeko paradak ikertzen ari badira ere, Irulegiko Irratia “indar bat egiteko prest da”, Bidarten erranetan. Finantzaketa kolektiboko kanpaina bat ere abiatuko dute laster.