TOPATU gazte webguneak dokumental bat ondu du, euskal « periferietako » sei gazteri hitza emanez, beren ikusmoldeak, asmoak eta arrangurak erdigunera ekartzeko.

Abendoaren 13an, ostiralarekin, arratseko 7ak30tan, proiektatuko da ZIZELKARIAK dokumentala (frantsesezko azpitituluak segurtatuak) Donapaleuko Xerbitxuguneko gibeleko gelan.

Hala, ageri zen, Amikuzeko bat ere beharko zen, periferia nunbait balin bada, hemen izanen baita, alabaina ;o).

Hona, TOPATUk berak nola aurkezten digun afera :

Zizelkariak dokumentala: sei ertz, sei borroka, sei gazte, erdigunera

• Euskal Herriko periferiak erdigunera ekartzeko asmoz, sei gazteri eman die ahotza Topatuk Zizelkariak dokumentalean.

Euskal Herriko periferietan, ertzetan, gazte mugimenduetako hainbat arlotan borrokan ari diren sei gazteri ahotsa emango die Zizelkariak dokumentalak: Arkaitz, Martta, Edurne, Maika, Jon eta Ibai dira protagonistak.

• Maika Alfaro, Alduden bizi eta lan egiten duen gaztea.  Aldudeko ibarra bizi eta gazte ikusi nahi luke. Despoblazioaz, etxe hutsen auziaz eta herri txikietan saretzen diren harremanez hitz egingo  du.
• Edurne Sanchez Leon, Tuterako mugimendu feministako kidea.  Feminismoaren beharra euskaldun gisa jasaten zuen zapalkuntzatik sentitu zuen. Erribera Intsumisa taldeaz eta feminismotik Euskal Herria eraikitzeaz arituko da.
• Ibai Osinaga Gogorcena, Irunberriko musikari gaztea.  Gitarra eskutan duela begiratzen dio bere inguruari. Gubia eta mingaina zorroztuta mintzatuko da; musikan gazte hasteaz, Euskal Herriko eszenaz eta Irunberritik euskaraz kantatzeaz.
• Arkaitz López Sanchez, Mamariagako gazte langilea. Ezkerraldetik begiratzen dio Euskal Herriari. Desindustralizazioaren ondorioz, gazteon lan prekarietateaz eta antolatu eta saretzeko beharraz arituko da solasean.
• Jon Marauri Aranburu, Moretako gaztea.  Jai herrikoiak antolatzen hasita Arabar Errioxako gazte asanblada sortu zuten, ingurua eraldatu eta euskaldundu nahian. Turismoaz, ardoaren ekoizpenak sortzen duen prekarietateaz eta etorkizuneko ametsez mintzatuko da.
• Martta Irigoien Arrabit, Arberatzeko gaztea.  Diglosiaren ondorioak bizi ditu. Libertimenduan parte hartuz, kolektiboan euskara Amikuzeko paisaian gorpuztu nahi izan du. Aldaka gaztetxean ere euskararen eta kulturaren aldeko borrokan dihardu.

Negua joan da aurten ere, eta Libertimenduz ongi ospatu da, Makeatik hasirik, pasa Iruñatik, Donapaleu eta azkenik Urepelen. Santibateak gehiago lekutan ospatu dira, Donibane Garazi eta Irisarrin bezala.

Pesta egiteko molde bat, irri egitekoa, gure buruaz eta besteetaz, gauza bera baita undarrean, finkatzen ari da, hinki-hanka, bere esperimentu, kausitze eta hutsegiteekin. Abian den errota bezala da, bidea ere bidea eginez deskubritzen duena, eta interesgarriena orain, toki desberdinetarik, egoera desberdinetan, mainuan sartzera ausartzen diren jendeekin, egiteko molde batzu marrazten direla, hain berdinak eta hain diferentak aldi berean.

Negu beltzak milaka aurpegi baditu, sasoinaz bestalde, izan bakoitzaren bizi uneari doakiona ala izan gure herriak bizi duena azken mende honetan… Eta neguak ez digu kentzen pesta egiteko aski hats badugula, bere beltzean ere gozatzeko izpirituen eta gorputzen barneko argia !