Ari dira lanean dantzariak, ari lanean zirtzilak, eta agian bertsulariak ere. Amikuzeko, Euskal herriko eta mundu guziko jende xintxoak ere urte luze batez arizanak dira lanean, beste hainbeste ahalgerik gabeko itsuskeri eta ezinegon sortuz denetan. Ordu da ihauteri hauetan bazterrak garbi ditzagun, eleak xuri, gauzak beren lekuan utz ! Horien solas izanen dute zirtzilek Donapaleun, otsailaren 19an, igande goizez, eta dantzariak gainetik pasatuko zaizkie beste behin, gauzak heinean gelditzea inporta baitzaie, bertsulariek sintesia potable bat egiteko gisan…

Goizeko 9ak 30etan, miñu kartierretik, frantxixkanoen komentu ohi ondotik abiatuko da kabalkada, bizpahiru tokitan jauziak emanen, eta 11etan abere merkatu plazan libertimenduko emanaldia eginen da. Aldizka, bolantek, zirtzilek eta bertsulariek tripan dutena beren jendarteari erakutsiko dute eta oren batean denek betan mutxikoak emanen ditugu Amikuzeko eta Burgaintziko bi txarangek lagundurik.

Ondotik, gomit gira ikastolak apailatu bazkariaren gozatzera, Airetik salan. Han pestak jarraituko du, kantu dantza eta bertsu artean. Izena emazue gaurdanik hemendik beretik meilatuz edo deituz Pettan (06 81 51 96 83).

Santibate gaua arras ederki igan zuten Amikuzeko zirtzilek, ostatuz-ostatu ibiliz otsailaren 04eko ibiakoitz astiritik goiti. Trikitia lagun, aurten ere sasi-bertsulari andana atrebitu zen kopla moldatzera, zortzikote bat osatzeraino. Urterik-urte ikusten dugu zaletasuna eta atrebentzia gora doatzila, eta horrek, tripotek eta garagardoek bezainbat berotzen gaituzte! Dolu bakarra, usaian baino gazte gutiago hurbildu izana. Baliteke hizkuntz zaletasunak beste zaletasunen heinean ez goratzea, baliteke jendartean zikin eta trapu agertzea ez asumitzea, edo ez ulertzea garbia ere zikinak egiten duela (eta zikina garbiak!), baliteke aurten elur ainitz izana eta lerraguneetan izaitea the place to be azkarrena, … baliteke denetarik eta agian beste zerbait! Anartean, ihauteriak ospa ditzagun ospa egin ez dutenekin..

Biba ihauteriak beraz !

Ihauterien aroa dugu. Europa zahar guzian, eguberritik martxo apirilera arte, konfunditzen dira eguberri, urtats eta ihauterien aroa. Olentzero bera ez da zirtzil hastial eta zikin horietarik baizik, abertzaleismo neo-klasikoak papa-noeltzen duen arte.

Hemen, Baxenabarre deitzen den lurralde huntan, Santibate eta Libertimenduak bereizi ditugu. Garazi aldean famatuagoak dira, baina lekukotasunak bildu-doi Banka kaskoan, nola Oztibarre aldean, hala Amorotzen gaindi ere jakiten dugu etxez-etxeko eske-kantuaren errituala egiten zela joan den mende hortan gaindi.

Dena dela, duela 7 urte (arra)hasirik, aurten ere Amikuzeko gazteri batek bi hitzordu finkatu ditu.

Lehena Santibate, helduden urtarrilaren 24an iganen da. Azken 4 urteetan bezala, gazteak maskaturik ibiliko dira Donapaleuko karriketan « Santibatek andere… » kantatuz, bertsuak botatuz eta ahoratzen ahalko dituztenetaz asez, leher eta zapart egin arte. Kasu, hau ez da ikusgarri bat, bizitzeko gauza bat baizik ez, eta gazte zirtzilez eta zirtzil gazteez kanpo, nehor ez da gomit ! Lekuan berean eskertuko dituzte Donapaleuko ostalerrak eta elkarteak beren bihotz onarentzat (eta prefosta, madarikatuko atea idekiko ez dietenak oro!).

Handik  2 aste, Libertimendua izanen dugu. Otsailaren 8a, igande goizeko 9ak30etarik aitzina, karrika ibilaldiarekin abiatuko dena. Burgaintzi eta Iruski taldeetako bolant mutiko eta neskak jadanik antrexanten trebatzen ari dira. Amikuzeko txaranga ere aire berrien ikasten, dantzariek manaturik! Ez dira segurki kikiltzekoak zirtzil ahobero eta ahalgezungarrien aintzinean, eta aurten ere fida dira fueratuko dituztela kalapita egileak gure hiri kapitaletik, bakea eman dezaten helduden negua arte bederen…

Pesta haundia izanen ahal da aurten ere, eta jadanik zuen izenak emaiten ahal dituzue bazkarirako (edo hemendik beretik, edo deituz 06.81.51.96.83).  Kantu, bertsu eta gazteri beroa segurtatuak dira.

Santibate egina, orai Libertimendua

Joan den ibiakoitzean, Amikuzeko 50 bat gaztek bazterrak harrotu dituzte Donapaleun barna. Zahar etxetik hasirik ostatuz-ostatu ibiliak dira gauean barna, maskaturik, beltzaturik eta kantu, bertsu eta irrintzinen eskasik gabe. Ongi etorriak izan direnetan, jan eta edan dute ausarki (ukanak oro alabaina). Zahar etxeko langile ekipa eta Trinketeko, Lafiteneko, Xabieneko eta Lakozteneko ostatuek esker beroenak merezi dituzte. Ohar berezi bat sasi-bertsulari multxoari, jarrai bezate bide hortarik eta memento onak biziko ditugu oraino luzaz!

Santibate igana da beraz, eta orai Libertimendua izanen da otsailaren 8an, igandearekin. Usaia hartu dugun bezala, goizeko 10etan kabalkada abiatuko da Donapaleuko 4 sartzeetarik batetarik, aurten Aiziritzeko sargiatik. 11etako Abere merkatu plazara helduko dira Burgaintziko eta Iruskiko dantzariak, Kitzikazankeko zirtzilak, Amikuzeko txaranga eta bertsulariak. Aurtengo libertimendua jokatuko dute barranban eta 12ak 30ak iriko mutxikoak dantzatzen ahalko ditugu denek, plaza gureturik primadera beroagoen esperantzan. Ondotik, pestak Airetik gelan jarraikiko du, bazkariarekin (izenak eman gaurdanik otoi 07 82 19 03 03), eta arratsaldeko giro beroan kantu, bertsu eta dantzak ez dira falta izanen.

Amikuzeko ikastolako burrasoek dute Libertimenduetako bazkaria apailatuko. Hitzordua emana da 13.00-ean, Donapaleuko Airetik gelan. Bazkaria 13-€tan (hera entsalada, zikiro azpia ilarrekin, sagar tarta, gasna, kafea, arnoa barne). Haurrentzat menu berezia 6-€tan.

Negua finituko dela eta primadera hobeak jinen direlako antolatzen da pesta hau. Ez hutsegitekoa beraz.